साउन १२,काठमाडौ : हेटौंडा उपमहानगरपालिकाकी प्रमुख मिनाकुमारी लामाले सम्पत्ति विवरण सार्वजनिक गरेकी छन् । ५ वर्ष उपमहानगरको उपप्रमुखको जिम्मेवारीपछि नगर प्रमुखको
जिम्मेवारीमा रहेकी लामाले सार्वजनिक गरेको सम्पत्ति विवरणमा १५ तोला सुन, २० तोला चाँदी र पारिश्रमिकबाहेक बैंकमा २० हजार मौज्दात रहेको उल्लेख छ ।
नेकपा एकीकृत समाजवादीबाट टिकट पाएकी लामाले पारिश्रमिकबापत पाउने ४० हजार रुपैयाँ कृषि विकास बैंकमा रहेको जनाएकी छिन् । सार्वजनिक गरेको सम्पत्ति विवरणमा अन्य कुनै पनि कारोबारमा आफू संलग्न नभएको जनाएकी छन् ।
उनले सार्वजनिक गरेको विवरणमा ससुरा कान्छा लामाको नाममा हेटौंडा–१ चाइनाक्वाटरमा ११ धुर, सासू सानुमैयाको नाममा सवा १० धुर र सवा ६ धुर र ससुरा कान्छा लामाको नाममा ११ रोपनी जमिन रहेको उल्लेख छ ।
श्रीमान् सुनबहादुर लामाको नाममा कृषि बिकास बैंकमा ४० लाख ऋण रहेको छ भने ४० लाख बराबरको टयांकर र छोरा सुमित लामाको नाममा एउटा २ लाख ५० हजार बराबरको मोटरसाइकल रहेको उल्लेख छ ।कान्तिपुरमा खबर छ ।
