साउन १९, काठमाडौं : अर्थसचिव मधुकुमार मरासिनी सोमबार पनि मन्त्रालयमा उपस्थित भएनन् । सचिव मरासिनी आइतबार पुनः मन्त्रालय फर्किएका नवनियुक्त अर्थमन्त्री
जनार्दन शर्माको स्वागतमा पनि अनुपश्चित थिए । पोखरामा आयोजित एक कार्यक्रममा सहभागी भएर काठमाण्डु फर्कने तयारीमा हरेका मरासिनी शर्मा मन्त्रीमा फर्कने भएपछि उतै बसेका थिए ।
मरासिनी नआएपछि शर्मालाई राजश्वसचिव कृष्णहरि पुष्करले स्वागत गरेका थिए । बजेटमा राजश्व र करका दर हेरफेरका लागि बिचौलिया प्रवेश गराएको भन्ने आरोपमाथि छानबिन गर्न गठित समितिले आरोप पुष्टि हुने आधार नभेटिएको प्रतिवेदन
बुझाएसँगै शर्मा पुनः मन्त्री बनेका हुन् । शर्माले पदबाट राजीनामा दिनुअघि २२ असारमा श्रीमती बिरामी भएको भन्दै मुख्यसचिव शंकरदास बरागीबाट स्वीकृत गराएर अनिश्चितकालीन बिदामा बसेका थिए ।
तर, मन्त्री शर्माले राजीनामा दिएपछि उनी भोलिपल्टै काममा फर्किए । संसदीय समितिमा बयान दिन उपस्थित भएका बेला भने मरासिनीले आरोप लगाइएजस्तो बजेट निर्माणमा अनधिकृत व्यक्ति प्रवेश नभएको बताएका थिए ।
समिति सदस्यहरुका अगाडि बयान दिँदादिँदै उनी भक्कानिएर रोएका थिए । श्रोतका अनुसार सचिव मरासिनीले प्रधानमन्त्री शेरबहादुर देउवा र माओवादी अध्यक्ष पुष्पकमल दाहाल प्रचण्डलाई भेटेर शर्मा पुनः मन्त्रीका रुपमा फर्किए आफू
उनीसँग काम गर्न नसक्ने जानकारी यसअघि नै दिएका थिए ।
शर्मा मन्त्री हुने पक्का भएपछि सोही जानकारी गराएर मरासिनी पोखरा हिंडेका हुन् । उनले आफ्नो अन्यत्रै सरुवा गरिदिन देउवा र प्रचण्डलाई भनेका छन् ।
